Þorgrímur Þráinsson, rithöfundur og fyrrverandi landsliðsmaður í fótbolta, varpaði fram athyglisverðri hugleiðingu á Facebook-síðu sinni í gærkvöldi sem margir hafa tekið undir.

Benti Þorgrímur á að við greiðum rúmlega 20.000 krónur á mann í útvarpsgjald á hverju ári og höfum ekkert val um það.

„Ef 1000 kr. af þessari upphæð færi í Afrekssjóð, til stuðnings afreksíþróttafólki (ekki veitir af), sem getur aukið hróður Íslands um heim allan, myndu um 300 milljónir safnast árlega,“ sagði Þorgrímur sem tók fram að þetta væri skrifað undir áhrifum þess að fylgjast með Ólympíuleikunum sem nú fara fram í París.

Þorgrímur er ekki sá eini sem hefur kallað eftir því að aukið fjármagn verði sett í afreksíþróttir hér á landi. Vésteinn Hafsteinsson afreksstjóri ÍSÍ hefur verið áberandi í þeirri baráttu.

„Ég segi það bara beint út, við þurfum miklu betri umgjörð, við þurfum miklu betri skipulagningu til lengri tíma og við þurfum fjórfalt til fimmfalt fjármagn á miðað við hvað er í afreksíþróttum í dag og þá hef ég engar áhyggjur af þessu,“ sagði Vésteinn í viðtali við RÚV í júlí og sagði að stefnan hefði verið að ná inn fleiri en fimm íslenskum keppendum á Ólympíuleikanna í París.

„Ég er ekki sáttur við að fara með fimm en mér finnst þessi fimm vera góðir fulltrúar og flott fólk, við verðum bara að reyna að gera gott úr því. Ég vil ná miklu fleirum á Ólympíuleika í framtíðinni.“