Bandarísk hjón sem búa á Washington svæðinu geta ekki hugsað sér að vera í Bandaríkjunum á meðan kosningarnar standa yfir í næstu viku. Ákváðu þau að flýja til Íslands.
Hjónin heita Mary og Tony Ruffine og búa í Arlington í Virginíufylki, rétt vestan við höfuðborgina Washington. Þau hafa verið gift í 35 ár.
Í þættinum Inside Edition á sjónvarpsstöðinni CBS greina þau frá því að þau geti ekki hugsað sér að vera í Bandaríkjunum á meðan kosningarnar standa fyrir, þar sem Donald Trump og Kamala Harris etja kappi. Þess vegna ákváðu þau að fara í vikulangt ferðalag til Íslands.
„Það verður svo mikill hávaði og svo mikil ringulreið. Svo mikil upplýsingaóreiða í gangi og miklar tilfinningar í spilinu,“ sagði Mary í viðtali þegar þau hjónin voru um það bil að fara úr landi.
Í viðtali við miðilinn Axios segir Tony að öll fjölmiðlaumfjöllunin í kringum forsetakosningarnar geri það of stressandi að vera heima í Bandaríkjunum. Þessu hafi þau lent í árið 2020 þegar Joe Biden og Donald Trump áttust við. Þá hafi hjónin reynt hvað þau gátu til þess að leiða þetta allt saman hjá sér til þess að geta slakað á.
„Í ár fannst okkur betra að bara flýja land,“ sagði Tony í viðtalinu.
Hjónin eru hins vegar ekki alfarið mótfallin stjórnmálaþátttöku. Þau kusu snemma utan kjörfundar áður en þau héldu af stað í ferðalagið. Á Íslandi hyggjast þau aftengja sig umfjöllun um bandarísk stjórnmál og njóta ævintýra í náttúrunni í staðinn.
Tony og Mary eru ekki einu Bandaríkjamennirnir sem ætla að flýja land. Í Inside Edition er einnig rætt við konu að nafni Sophia Gallup og starfar sem lobbíisti í Washington. Myndi maður halda að hún væri öllu vön þegar kæmi að pólitísku áreiti en kosningarnar í ár eru of mikið. Hún ætlar til Spánar á meðan þeim stendur.
„Vegna minnar eigin geðheilsu fer ég úr landi núna. Það er svo mikil grimmd, stress, kvíði og spenna í gangi í aðdraganda þriðjudagsins. Það hjálpar minni geðheilsu að fara úr landi,“ sagði Sophia.
En ekki allir búa við þann lúxus að geta farið úr landi til þess að losna við heiftina og stressið sem liggur í loftinu í Bandaríkjunum núna. Það er þó hægt að dempa þetta með því að fara út í sveit.
Krysten Copeland, sem býr í Washington, ætlar að flýja borgina og vera í sumarbústað í Canaan hæðum í Vestur Virginíu fylki.
„Af því að það er orðið ljóst að þessi kosning er harðari en flestir bjuggust við ákvað ég að vera örugg og halda geðheilbrigðinu utan við borgina,“ sagði Krysten í viðtalinu við Inside Edition.
