Sindri Freyr Guðmundsson lést aðfararnótt mánudagsins 27. maí, aðeins 26 ára að aldri. Banamein hans var arfgeng heilablæðing. Sindri Freyr skilur eftir sig kærustu, Margréti Eyjólfsdóttur, þrjú börn á aldrinum sjö til átta ára og á Margrét von á fjórða barninu.

Til þess að létta undir með fjölskyldu hans hefur verið stofnaður styrktarreikningur fyrir útfararkostnaði og öllu því sem þarf að huga að. Reikningurinn er á nafni Margrétar og þeir sem vilja leggja fjölskyldunni lið á þessum erfiða tíma geta lagt inn á:

Kennitala: 280995-2829
Reikningsnúmer: 0123-15-163075

„Minningin um elsku Sindra Freyr mun lifa áfram um ókomna tíð,“ segir í færslu um söfnunarreikning sem DV fékk góðfúslegt leyfi til að fjalla um.

Vildi ekki vorkunn 

Sindri Freyr missti móður sína úr sama sjúkdómi þegar hann var aðeins sjö ára. Um helmings líkur eru á að fólk í hans fjölskyldu séu með sjúkdóminn en það er á valdi hvers og eins að ákveða hvort þau vilji vita hvort þau beri genið eða ekki. Flestir í hans fjölskyldu hafa látist úr sjúkdómnum í kringum þrítugt. 

Sindri Freyr var í viðtali við Ísland í dag 3. janúar í fyrra, en þar sagðist hann hafa verið fimmtán ára þegar hann og systur hans ákváðu að þau vildu vita hvort þau væru með sjúkdóminn. 

Sagðist hann alls ekki vilja vorkunn og vera mjög stoltur af sjálfum sér fyrir það hvernig hann hefur tekist á við sinn sjúkdóm, en þegar viðtalið var tekið hafði hann fengið sjö heilablæðingar.

„Ég hef alltaf horft á það þannig að með aldrinum ert þú að fagna árunum nær dauðanum. Eftir sjö blæðingar get ég sagt að ég sé ekki hræddur að fá blæðingu. Einkennin sem koma eru rosalega óþægileg en ég hef alltaf náð að halda mér rosalega rólegum í kringum allar blæðingar og getað talað við alla og svona.“

Horfa má á viðtalið við Sindra Frey hér.