„Ég vil taka skýrt fram að það er sannarlega ekki verið að skoða að taka upp gjaldskyldu á notkun nagladekkja í Reykjavík. Sjálfur tel ég mikilvægt að fækka nagladekkjum enda bætir það loftgæði. Það gerum við með fræðslu – og bættum snjómokstri og söltun,“

segir Einar Þorsteinsson borgarstjóri í færslu á Facebook sem hann segist skrifa „í tilefni af undarlegri frétt Mbl af annars góðu málþingi um loftgæði í Reykjavík.“

Einar bendir á að í Reykjavík býr fólk „sem kýs að nota nagladekk öryggisins vegna og yfirleitt vegna þess að það á oft erindi út fyrir borgarmörkin. Höfuðborgin er líka allra landsmanna og hingað kemur fólk sem býr við aðrar aðstæður en flestir íbúar borgarinnar.

Ég myndi styðja jákvæða opinbera hvata til þess að gera harðkornadekk eða aðrar slíkar tegundir hagkvæmari kost en nagladekk. En boð og bönn og auknar álögur hugnast mér ekki.“