Maður að nafni Florian Lunca var þann 18. desember síðastliðinn fundinn sekur um fjölmörg brot. Hann var ákærður fyrir samtals 41 brot og er svo gífurlegur brotafjöldi í einu máli fátíður, ef ekki óþekktur.

Flest brotin eru þjófnaðarbrot en Florian var þó líka fundinn sekur um líkamsárás, að hafa laugardaginn 28. janúar, utandyra við skemmtistað, veist með ofbeldi að manni og slegið hann með krepptum hnefa hægra megin í andlit þeim þeim afleiðingum að maðurinn hlaut skurð á augnbrún og rétt undir augnloki.

Þjófnaðarferillinn er gífurleg skrautlegur, en þess skal getið að brotin eru öll framin á árinu 2023. Florian var meðal annars sakaður um að hafa stolið demantshringjum úr skartripaverslun, að verðmæti yfir tvær milljónir króna.

Hann var einnig sakaður um að hafa klifrað yfir glervegg í verslun og stolið Cazal og Retro umgjörðum að óþekktu verðmæti. Hann var einnig sakaður um að stela Canadian Goose úlpu úr verslun, að verðmæti um 190 þúsund krónur.

Hann var einnig sakaður um að stela miklu magni af ilmvötnum og fjölmörgum farsímum við hin ýmsu tilefni.

Einnig stal hann fjórum Roborock-ryksugum úr verslun að verðmæti um hálfa milljón króna.

Florian játaði öll brot sín fyrir dómi og viðurkenndi bótaaskyldu. Saksóknari féll hins vegar frá örfáum ákæruliðum. Athyglisvert er að Florian hefur fram að þessari brotahrinu ekki áður gerst brotlegur hér á landi. Afbrotaferill hans á Íslandi hófst því árið 2023.

Var Florian Lunca dæmdur í 13 mánaða fangelsi en frá því dregst gæsluvarðhald en hann hefur setið inni óslitið frá 18. október 2023 á meðan lögregla rannsakaði brotahrinuna.

Dóminn má lesa hér.