Þvotturinn er eitthvað sem yfirgefur okkur aldrei og þvottakarfan virðist nær aldrei tæmast. Margir elska að þvo, meðan aðrir hata þetta heimilisverk og forðast í lengstu lög að henda í vél.
Það er klassískt að velta fyrir sér hversu oft, eða hversu sjaldan á að þvo tilteknar flíkur.
Breska sturtufyrirtækið Showers to You ákvað á dögunum að kanna hversu oft bBetar þvo handklæðin sín. 2.200 svör bárust og niðurstöðurnar eru þær að 44% Breta þvo handklæðin sín aðeins á þriggja mánaða fresti.
BBC fjallaði um könnunina og þar kom fram að 20% svarenda sögðust þvo handklæðin sín einu sinni í mánuði, 25% þrífa handklæðin vikulega og 5% þrífa handklæðin eftir hverja notkun.
„Ég er í nettu áfalli því ég hefði haldið að handklæðin yrðu skítug, sveitt og mjög óþægileg í notkun,“ segir Dr. Sally Bloomfield, sérfræðingur í hreinlæti heimilis og smitsjúkdómavörnum, við BBC.
Segir hún að skynsamlegt sé að þrífa handklæði að minnsta kosti einu sinni í viku.
„Þrátt fyrir það að handklæðin líti út fyrir að vera hrein, þá safnast milljónir örvera fyrir á þeim með tímanum sem getur haft heilsufarslega hættu í för með sér fyrir þig og aðra sem búa með þér á heimilinu,“ segir Bloomfield og bætir við að ef handklæðin eru ekki þvegin reglulega „þá safnast fjöldi örveranna upp í handklæðunum og svo þegar þau eru loks þvegin þá er mjög erfitt að fjarlægja þær allar.“
Bendir Bloomfield á að þegar við þurrkum mismunandi svæði líkamans taka handklæði upp örverur, sem dæmi á fótum okkar þær sem valdið geta fótsveppum.
Flestar lífverur á húð okkar eru ekki smitandi, en ef þær komast í skurði og sár á líkama okkar getur slíkt valdið sýkingum að sögn Bloomfield, „ef þú býrð með öðrum, þá ættir þú að vera sérstaklega varkár. Stundum berum við áfram lífverur sem valda því kannski ekki að við verðum veik á því augnabliki, en ef við sendum þær áfram til annarra geta þeir orðið veikir.“
Og þó lífverurnar valdi okkur ekki skaða, getur annað átt við aðra heimilismenn, til dæmis þegar heimilismenn deila handklæði sem þegar hefur verið notað eða slíkt handklæði er þvegið með öðrum flíkum. „Þannig getur sýking breiðst út.“
Og þó að þú búir ein/n/tt ráðleggur Bloomfield að láta ekki lengur en tvær vikur líða þar til kemur að þvotti.
Dr Cristina Psomadakis húðsjúkdómalæknir fyrir hjá bresku heilbrigðisstofnuninni NHS hvetur fólk til að gera áætlun um hversu oft eigi að þvo handklæði og þvottapoka.
„Ef þú þjáist af bólum í andliti eða líkama eða bólgu í hársekkjum, þá viljum við að þú þvoir handklæðið þitt oft.“ Hún segir að léleg heimilisþrif, þar á meðal með þvott á handklæðum, geti verið þáttur í þróun húðsjúkdóma.
„Þú verður að taka á þessum hreinlætismálum. Annars mun málið halda áfram að vera vandamál fyrir þig.“
Ef þú ert einstaklingur sem mætir í ræktina þá eru allar líkur á að þú notir handklæði þar til að þurrka af þér svitann. Bendir Bloomfield á að nauðsynlegt sé að þvo þau handklæði reglulega.
„Þú ert að svitna og með því ertu að losa húðfrumur af yfirborði líkamans og fleiri bakteríur á handklæðið. Ef að þú þværð ekki handklæðið þá mun það mengast meira við næstu notkun og koll af kolli og þannig erfiðara að ná þvi alveg hreinu í þvotti.“
Hún segir að ef þú gerir það ekki muni það verða „mjög mengað“ og síðan erfiðara að afmenga það í þvotti.
Psomadakis mælir með að nota fleiri handklæði en eitt. „Ekki gleyma því að þegar þú ert að nota líkamshandklæði ertu að þurrka þig á stöðum þar sem þú gætir til dæmis verið með ákveðnar tegundir baktería sem tengjast hægðum. Og þó svo væri ekki þá ertu jafnvel að þurrka burt ýmsar örverur sem þú vilt ekki bera áfram í andlitið á þér.“
Bloomfield viðurkennir að það þurfi einnig að horfa til umhverfis- og kostnaðarsjónarmiða þegar kemur að þvotti, en hún segir að það sé betra að þvo reglulega við lágan hita en við háan hita af og til.
„Haltu örverunum þínum fyrir sjálfan þig.
