Landsréttur hefur staðfest dóm Héraðsdóms Reykjaness yfir Mhd Badr Eddin Kreiker sem dæmdur var í tveggja ára og þriggja mánaða fangelsi fyrir íkveikju og tryggingasvik.

Málið snertir eldsvoða á veitingastað hans, Kebab House, sem varð 21. júní 2020. Tveir voru fluttir á sjúkrahús eftir brunann vegna gruns um reykeitrun. Staðurinn var til húsa við Hafnargötu í Keflavík en er ekki starfræktur lengur.

Síðar kom í ljós að eigandinn hafði valdið brunanum. Kveikti hann eld á tveimur mismunandi stöðum í húsinu, undir borði við kjöstand og grill annars vegar og hins vegar í hillu undir hitabökkum hjá afgreiðsluborðinu. Hann bar að eldfim efni á þessi svæði og lagði eld að með þeim afleiðingum að eldurinn breiddist út.

Mánuði eftir brunann gerði hann tilraun til að fá greiddar bætur vegna tjónsins hjá VÍS. Tryggingafélagið hafnaði kröfunni með vísan til þess að um íkveikju hefði verið að ræða.

Dóma Landsréttar og héraðsdóms í málinu má lesa hér.