Það vakti mikla athygli í síðustu viku þegar Zelenskyy rak varnarmálaráðherrann Olekseii Reznikov vegna fjölda spillingarmála innan hersins. Ef allt fer eins og Zelenskyy vill þá mun Rustem Umerov taka við embætti varnarmálaráðherra sem er auðvitað eitt allra mikilvægasta embættið í Úkraínu þessa dagana. „Hann þarfnast ekki frekari kynningar við,“ sagði Zelenskyy að sögn New York Post þegar hann tilkynnti að hann tilnefni Umerov í embættið.
Umerov er vel þekktur í Úkraínu. Á síðasta ári gegndi hann lykilhlutverki í samningaviðræðum við Rússa um útflutning á milljónum tonna af úkraínsku korni. Hann hefur einnig séð um fjölda samningaviðræðna við Rússa um fangaskipti og hann hefur séð um skipulagningu á brottflutningi óbreyttra borgara frá mestu átakasvæðunum.
Hann situr á þingi fyrir lítinn stjórnarandstöðuflokk sem heitir Holos en þrátt fyrir það hefur Zelenskyy tilnefnt hann í embættið. Bakgrunnur hans er einnig óvenjulegur því hann tilheyrir minnihlutahópi Krímtatara, sem eru aðallega múslimar, sem hafa sætt mikilli kúgun af hálfu Rússa í gegnum tíðina. Líklegt má telja að fljótlega verði Umervo hluti af innsta hring Zelenskyy.
Sveigjanlegi herforinginn
Valerii Zaluzhnyi hafði aðeins gegnt embætti yfirmanns úkraínska hersins í sjö mánuði þegar Rússar réðust inn í landið. En hann var svo sem enginn græningi því hann var næstæðsti yfirmaður hersins í austurhluta Úkraínu 2014 þegar barist var við uppreisnarmenn sem nutu stuðnings Rússa.
Hann leggur áherslu á opnar og auðveldar samskiptaleiðir innan hersins og að herforingar hafi mikið svigrúm til ákvarðanatöku á vígvellinum. BBC segir að þetta hafi veitt hernum mikinn sveigjanleika á vígvellinum, sem hafi átt stóran þátt í að koma í veg fyrir að rússneski herinn, sem er ekki mjög sveigjanlegur, hafi beinlínis valtað yfir úkraínska herinn. Umheimurinn veit vel af Zaluzhnyi en hann var valinn einn af 100 áhrifamestu einstaklingum heimsins á síðasta ári af Time Magazine.
Hann veitir sjaldan viðtöl en þrátt fyrir að halda sig til hlés frá kastljósinu er hann þjóðhetja í Úkraínu vegna góðs árangurs í stríðinu við innrásarherinn.
Hreinskilni utanríkisráðherrann
„Ég ráðlegg öllum gagnrýnendum að halda kjafti og koma til Úkraínu og reyna að frelsa einn fersentimetra.“ Þetta sagði Dmytry Kuleba, utanríkisráðherra, í lok ágúst þegar þolinmæði hans í garð þeirra, sem hafa gagnrýnt hægagang gagnsóknar Úkraínumanna gegn rússneska innrásarliðinu, þraut. Lét hann þessi ummæli falla á fundi utanríkisráðherra ESB-ríkjanna á Spáni.
Hann hefur gegnt embættinu síðan 2020 og hefur verið í fararbroddi í baráttunni fyrir að tryggja áframhaldandi stuðning Vesturlanda, pólitískan og hernaðarlegan, við Úkraínu.
Skuggi Zelenskyy
Þegar Zelenskyy birtist á almannafæri er Maksym Donets yfirleitt í för með honum og fylgir honum eins og skuggi. Hann er lífvörður Zelenskyy og hefur verið síðan 2019. Haft hefur verið á orði að hann sé einnig „tvífari“ Zelenskyy því þeir líkjast nokkuð.
Ráðgjafinn
Þegar tilkynningar eru sendar frá forsetaskrifstofunni þá er það yfirleitt Mykhailo Podolyak sem sér um það. Hann er aðalráðgjafi Zelenskyy og hann lætur sér ekki duga að hvísla góðum ráðum í eyru forsetans því hann tjáir sig oft við alþjóðlega fjölmiðla.
Njósnaforinginn
Það hefur eflaust verið erfitt fyrir Zelenskyy að þurfa að reka Ivan Bakanov úr embætti yfirmanns leyniþjónustunnar SBU í júlí á þessu ári. Það gerði hann í kjölfar frétta um að margir starfsmenn leyniþjónustunnar hefðu lagt Rússum lið. Bakanov og Zelenskyy eru æskuvinir og Bakanov var einn af aðalhöfundunum á bak við pólitískan feril Zelenskyy.
Vasily Malyuk tók við embættinu en hann hefur starfað innan SBU síðan 2001. Hann var maðurinn á bak við sprengjuárásina á Krímbrúna í október á síðasta ári og fjölda annarra aðgerða sem Úkraínumenn tjá sig ekki um. Reuters segir að hann hafi látið hafa eftir sér í júlí að margar sérsveitaraðgerðir hafi átt sér stað í stríðinu og hægt verði að ræða sumar þeirra opinberlega að stríðinu loknu en aðrar verði ekki rætt um.
