Rússneski herinn stendur nú frammi fyrir erfiðri ákvarðanatöku að mati breska varnarmálaráðuneytisins. Segir ráðuneytið að árásir rússneskra uppreisnarmanna, sem njóta stuðnings Úkraínu, í Belgorod í Rússlandi, geri að verkum að nú verði Rússar að velja um hvort þeir styrkja varnir sínar í héraðinu eða haldi herliði sínu í varnarstöðvum í Úkraínu.

Jacob Kaarsbo, sérfræðingur hjá dönsku hugveitunni Tænketanken Europa og fyrrum sérfræðingur hjá leyniþjónustu danska hersins, sagði í samtali við TV2 að það muni krefjast mikils af Rússum að halda landamærum sínum eins og staðan er núna.  „Rússar neyðast til að tryggja öryggið á eigin landamærum, annars getur það haft áhrif á stuðninginn heima fyrir,“ sagði hann.

Hann sagðist telja það stórt vandamál fyrir Rússa að rússneskir uppreisnarmenn eru farnir að gera árásir nærri landamærunum. „Rússar eru nú þegar í þröngri stöðu í Úkraínu og það að senda hersveitir til landamæranna er ekki gott fyrir þá,“ sagði hann.