„Úkraínskar hersveitir, vel búnar vopnum frá NATO og studdar af Bandaríkjunum, hafa ráðist inn í Rostov, Belgorod og Voronezj“ heyrðist forsetinn segja.
En þetta var í raun ekki Pútín heldur einhver sem þóttist vera hann og tókst að komast inn í útsendingar fjölda útvarpsstöðva með tölvuárás.
Þetta sagði Dmitry Peskov, talsmaður rússnesku ríkisstjórnarinnar, að sögn rússnesku ríkisfréttastofunnar RIA. Sagði hann að allt sem sagt var hafi verið lygi.
Ekki er vitað hvor einstaklingur var að verki eða hópur.
Á sunnudaginn voru þrjótar einnig að verki þegar þeir hökkuðu sig inn á margar sjónvarpsstöðvar á Krím og sýndu upptökur af úkraínskum hermönnum sem setja fingurinn upp að vörum sér og sussa. Þetta er myndband sem úkraínska ríkisstjórnin birti um helgina á Twitter í tengslum við gagnsókn Úkraínumanna.