Lögreglan á Norðurlandi eystra segir frá því á Facebook-síðu sinni að í gærkvöldi hafi hún haft afskipti af tveimur karlmönnum af erlendum uppruna. Mennirnir hafi verið staddir við verslanir á Akureyri og verið að betla fé af fólki undir því yfirskini að þeir væru að safna fé til styrktar heyrnarskertum. Segir enn fremur í færslunni:

„Þóttist annar mannanna tala táknmál en kunnáttuleysi hans á því sviði var afhjúpað þegar hann vatt sér að konu sem kann táknmál. Við nánari skoðun á þessum mönnum kom í ljós að þeir voru ekki að safna fé fyrir nein samtök og höfðu því vissulega engin leyfi til slíks. Þeir voru því að svíkja fé af fólki en virðast þó ekki hafa haft mikið upp úr krafsinu að þessu sinni. Þeir eru í löglegri dvöl hér á landi en við erum nú að skoða hvort þeir kunni að hafa tengsl við fleiri við sömu iðju og þá hvort þetta er stundað með skipulögðum hætti.“

Óskar lögreglan eftir því að fólk sem hafi orðið vart við peningasafnanir af þessu tagi hafi samband og tilgreini stað, stund og nánari lýsingu á viðkomandi aðilum.

Minnir lögreglan á að lokum að félagasamtök þurfi að fá leyfi til opinberra fjársafnana.