Úkraínusjóðurinn var stofnaður í mars eftir að meirihluti þingmanna samþykkti að setja 7 milljarða, sem svarar til um 140 milljarða íslenskra króna, í hann. Með viðbótarframlaginu hafa Danir sett 14,5 milljarða, sem svarar til rúmlega 290 milljarða íslenskra króna, í sjóðinn á þessu ári.
Mette Frederiksen, forsætisráðherra, sagði í samtali við Danska ríkisútvarpið að ástæðan fyrir auknu framlagi sé að stríðið sé nú á mjög krítísku stigi og staðan á vígvellinum sé alvarleg og Úkraína hafi því þörf fyrir alla þá aðstoð sem fáanleg sé.
„Það er núna sem Úkraínumenn hafa þörf fyrir vopnin okkar og stuðning okkar og þess vegna liggur á. En það er ekkert sem bendir til að friður verði kominn á á næsta ári og því setjum við núna rúmlega 10 milljarða í sjóðinn fyrir 2024,“ sagði hún.
Það er þörf fyrir nýtt fjármagn í sjóðinn því búið er að nota um 70% af því fé sem var sett í hann í upphafi.
Fyrra framlagið var ætlað til að styðja við úkraínska herinn, atvinnulífið og mannúðarmál og enduruppbyggingu landsins. Nýja framlagið er eyrnamerkt hernum.