Héraðssaksóknari hefur ákært Ómar Jóhannsson fyrir meiriháttar brot gegn skattalögum í rekstri fyrirtækisins Omzi ehf. Er Ómar sakaður um að hafa ekki staðið rétt að skilum á virðisaukaskattskýrslum vegna reksturs félagsins árið 2018 og er vangoldinn virðisaukaskattur sagður rúmlega 16,3 milljónir króna.
Ennfremur er Ómar sakaður um að hafa ekki staðið skil á staðgreiðslu opinberra gjalda fyrir árið 2018 og fyrir janúar 2019. Vangoldinn skattur er samtals rétt rúmlega 18 milljónir króna og meint skattsvik nema þá samtals rúmlega 34,4 milljónum króna.
Ákæran var gefin út í lok apríl og málið verður þingfest 1. júní næstkomandi fyrir Héraðsdómi Suðurlands. Omzi, sem var byggingarfyrirtæki með aðsetur í Hveragerði, var hins vegar úrskurðað gjaldþrota árið 2019. Skiptalok voru 2020. Lýstar kröfur í þrotabúið voru tæplega 223 milljónir króna að viðbættum vöxtum og kostnaði. Forgangskröfur voru tæplega 34 milljónir.
Engar eignir fundust í búinu og lauk skiptum án þess að nokkuð fengist upp í kröfur.
