Rannsóknarlögreglumennirnir sem leituðu að Madeleine McCann í Portúgal í vikunni fundu „haldbærar vísbendingar“ sem skipt gætu máli varðandi framhaldið. Þetta kemur fram í frétt portúgalska dagblaðsins Correio da Manha en alls tók lögregluaðgerðin þrjá daga.
Leitin, sem fór fram að frumkvæði þýsku lögreglunnar, beindist sérstaklega að svæðinu í kringum að manngerðri stíflu nærri bænum Silves, sem er skammt frá Praia da Luz þar sem stúlkan hvarf á sínum tíma. Um var að ræða fyrstu formlegu leitina að líkamsleifum hennar síðan árið 2014 og tók fjölmennt lið þátt í leitinni og naut meðal annars aðstoðar kafara og leitarhunda.
Uppgröftur fór fram á svæðinu og er verið að flytja ýmislegt sem fannst, meðal annars fatabútar og ótilgreinda plastmuni, til Þýskalands þar sem frekari rannsóknir munu fara fram. Búist er við að frumniðurstöður liggi fyrir í næstu viku en einhverjir mánuðir munu líða þar til lokaskýrslan verður fullkláruð.
Þá hefur þýska lögreglan sagt að ef engar nýjar haldbærar vísbendingar finnast í leitinni þá verði gefin út yfirlýsing um það á næstunni.
Þýski barnaníðingurinn Christian Brückner, sem er efstur á lista grunaðra, vandi komur sínar á leitarstaðinn sem hann kallaði litlu paradísina sína. Brückner er þekktur barnaníðingur og ofbeldismaður en hann var búsettur á Algarve þegar Madeleine hvarf. Hann hlaut sjö ára fangelsisdóm fyrir að nauðga sjötugri konu í Portúgal en dóminn afplánar hann í þýsku fangelsi.
