Þýskir rannsóknarlögreglumenn eru staddir í sumarleyfisstaðnum Algarve í Portúgal þar sem leit stendur yfir af líkamsleifum Madeleine McCann, fjögurra ára breskrar stúlku sem hvarf sporlaust þann 3. maí 2007. Daily Mail fjallar um málið en lögreglumennirnir eru sagðir vera að ætla að hefja leit á morgun á svæði sem níðingurinn Christian Brückner, sem er efstur á lista grunaðra, vandi komur sínar á.  Brückner er þekktur barnaníðingur og ofbeldismaður en hann var búsettur á Algarve þegar Madeleine hvarf. Hann hlaut sjö ára fangelsisdóm fyrir að nauðga sjötugri konu í Portúgal en dóminn afplánar hann í þýsku fangelsi.

Athygli lögreglumannanna mun sérstaklega beinast að manngerðri stíflu nærri bænum Silves og verða kafarar sendir á vettvang auk þess sem uppgröftur er ráðgerður í kringum stífluna. Lögreglumenn frá Scotland Yard eru einnig mættir til staðarins til þess að fylgjast með framvindu mála en búist er við að lokað verði fyrir umferð að svæðinu þegar leitin hefst.

Þetta er í fyrsta skipti síðan 2014 sem formleg leit að líkamsleifum stúlkunnar fer fram en þá fengu breskir lögreglumenn heimild til uppgraftar og notkun leitarhunda á Praia da Luz-svæðinu þaðan sem McCann hvarf.

Segir í umfjöllun breska miðilsins að leitin byggist meðal annars á ábendingu bílstjóra sem segist hafa séð konu afhenda stúlku, sem líktist McCann, til manns tveimur dögum eftir hvarf stúlkunnar. Portúgalskur lögfræðingur, Marcos Aragao Correia réð sjálfur kafara til að leita tvisvar á svæðinu árið 2008. Örsmá bein fundust í tveimur pokum í vatninu en portúgalska lögreglan útilokaði að um mannabein hefði verið að ræða.

Foreldrar McCann, Gerry og Kate, lýstu því yfir á sínum tíma að Correira væri aðeins á höttunum eftir athygli og að ekkert benti til þess að líki dóttur þeirra hefði verið komið fyrir á svæðinu.