Héraðsdómur Reykjavíkur hefur komist að þeirri niðurstöðu að Edda Falak blaðamaður Heimildarinnar hafi brotið lög um friðhelgi einkalífsins með því að birta hljóðupptöku af samskiptum mæðgna í hlaðvarpsþætti sínum Eigin konur á síðasta ári. Dómurinn var kveðinn upp í héraðsdómi í morgun.
Eddu er gert að greiða móður konu, sem var viðmælandi í þættinum 400 þúsund krónur í bætur, auk þess að greiða málskostnað konunnar, 900 þúsund krónur. Mbl.is greinir frá.
Viðmælandi Eddu tók upp samtal hennar við móður sína án hennar vitundar. Hljóðupptakan var spiluð í Eigin konur og höfðaði móðirin mál gegn Eddu og sakaði hana um að hafa brotið gróflega gegn friðhelgi einkalífs síns með birtingu á hljóðupptökunni.
Stefnandi málsins, móðirin, gerði þó ekki þá kröfu að upptakan yrði fjarlægð úr þættinum eða af samfélagsmiðlum. Þá kröfu lagði hún hins vegar fram við Fjölmiðlanefnd síðasta haust, nefndin ákvað að fresta meðferð kröfunnar eftir að konan höfðaði mál gegn Eddu, en nú stendur til að taka afstöðu í málinu 27. apríl.
Auður Jónsdóttir lögmaður konunnar segir í samtali við Mbl. is að vinnubrögð fjölmiðlanefndar séu óboðleg og ef nefndin starfaði eins og hún ætti að gera samkvæmt lögum væri hún löngu búin að taka afstöðu í málinu og krefjast þess af Eddu að upptakan yrði tekin úr þættinum og af samfélagsmiðlum. Niðurstaða héraðsdóms hafi sannað það að miðlun hennar bryti í bága við friðhelgi einkalífs.
Auður segir jafnframt að móðirin, umbjóðandi hennar, neiti því alfarið að hún hafi beitt dóttur sína ofbeldi líkt og dóttirin haldi fram í þætti Eddu.
Lögmaður Eddu segir ekki búið að taka ákvörðun um hvort málinu verði áfrýjað til Landsréttar.