Í nótt voru björgunarsveitir á Suðurlandi kallaðar út til aðstoðar ferðafólki á þjóðvegi 1, við Pétursey. Þar var orðin talsverð ófærð og nokkur fjöldi bíla sem voru fastir.

Yfir 50 manns var komið til bjargar á þessum slóðum, um 30 voru fluttir á fjöldahjálparstöð sem opnuð var í Vík í Mýrdal, og öðrum var komið fyrir í annarri gistingu. Einhverjir gátu haldið áfram för, en veður austan Víkur var skaplegra færi.

Um fimm í morgun hafði öllum verið komið til aðstoðar og björgunarfólk hélt heim. Fjöldi bíla var hins vegar skilinn eftir við Pétursey og verkefni morgunsins hafa verið að koma fólki aftur að bílunum og losa þá.

Á Fjarðarheiði eru björgunarsveitir nú að koma fólki til aðstoðar sem lagði á heiðina í morgun. Ferjan Norræna áætlaði að leggja úr höfn á hádegi í dag og einhverjir þeirra sem nú eru í vandræðum á Fjarðarheiði áttu bókað far með henni.

Þar er nú mikil ófærð og vegurinn lokaður samkvæmt upplýsingum af vef Vegagerðarinnar.

Meðfylgjandi eru myndir frá aðgerðum við Pétursey í nótt.