Landsréttur staðfesti á föstudag dóm Héraðsdóms Reykjavíkur frá 15. mars 2022 þar sem hafnað er 8 milljóna kröfu konu sem rekin var úr starfi frá hjúkrunarheimili. Brottrekstrarsökin var sú að hjúkrunarheimilið taldi konuna hafa deilt upplýsingum úr sjúkraskrám heimilisins til óviðkomandi aðila. Konan neitaði þessu fyrir dómi.
Málsatvik eru rakin í hinum staðfesta dómi Héraðsdóms og þar kemur fram konan hafi undirritað þagnarheit þar sem hún hét því að gæta trúnaðar og þagnaskyldu í starfi sínu. Hún hafi jafnframt skrifað undir yfirlýsingu vegna aðgangs að sjúkraskrám hjúkrunarheimilisins og þar staðfest að hún hafi lesið reglur um notkun sjúkrarskrárupplýsinga og hafa heitið að fara í einu og öllu eftir þeim. Síðan segir orðrétt um málsatvik í nafnhreinsuðum dómi héraðsdóms:
„6. Hinn 18. febrúar 2021 barst framkvæmdastjóra stefnda ábending […] þess efnis að upplýsingar úr sjúkraskrá íbúans væru til umræðu á samfélagsmiðlum. Um var að ræða upplýsingar um að […].
7. Meðal gagna málsins er færsla nafngreindrar konu á frá [samfélagsmiðill]. Þar kemur fram að […]. Nánar tiltekið segir: […] Jafnframt birti sami einstaklingur aðra færslu þar sem þetta atvik var áréttað og tekið fram að […].“
RÚV upplýsir í gær að hjúkrunarheimilið sem hér átti í hlut sé Sóltún og að sjúklingurinn sem lekið var upplýsingum um tengist Ölmu Möller, landlækni, fjölskylduböndum. Umræðurnar á samfélagsmiðlum endurspegluðu meðal annars neikvæða afstöðu til bólusetninga gegn Covid-19. Sóltún hrinti af stað rannsókn meðal starfsfólks heimilisins og kom í ljós að umræddur starfsmaður tengdist tveimur konum sem höfðu rætt upplýsingarnar á samfélagsmiðlum. Var hún þá kölluð til fundar hjá framkvæmdastjóra hjúkrunar, hjúkrunarstjóra og persónuverndarfulltrúa. Í texta héraðsdóms segir að stjórnendurnir haldi því fram að hún hafi viðurkennt að hafa rætt málefni sjúklingsins við eina af konunum sem ræddu upplýsingarnar á samfélagsmiðlum, en hún neitaði því fyrir dómi að hafa viðurkennt það:
„Stefnanda mun hafa verið sýnd mynd af […] þar sem hún var ásamt fimm konum, þar með talið tveimur sem höfðu tjáð sig um upplýsingarnar á […]. Hún var spurð um tengsl sín við umrædda aðila og kvaðst hún þekkja aðra konuna, C. Aðila greinir á um hvað fór að öðru leyti fram á fundinum. Stefndi telur stefnanda hafa staðfest
að hún hefði rætt málefni íbúans við umrædda konu, […]. Hins vegar telur stefnandi atvik ekki hafa verið með þessum hætti og að hún hafi aðeins staðfest að hún þekkti C.“
Allir aðrir sem voru á fundinum, samtals þrír stjórnendur, staðfestu hins vegar fyrir dómi að konan hefði játað lekann á fundinum. Því hefði ekki annað komið til greina en að segja henni upp störfum enda brotið mjög gróft.
Það var niðurstaða héraðsdóms, sem Landsdómur hefur núna staðfest, að Sóltúni hafi verið heimilt að segja konunni upp störfum og er því kröfum hennar hafnað.
