Áður en snjóflóð féllu á hús í Neskaupstað í morgun hafði verið tekin ákvörðun um að rýma þau en það tókst ekki í tæka tíð. Þetta kemur fram á vef RÚV en þar segir Magni Hreinn Jónsson, fagstjóri ofanflóða hjá Veðurstofu Íslands, að í ljósi þess verði að endurskoða verklag og ákvarðanatöku varðandi rýmingar. „Rýming hefði náttúrulega þurft að gerast fyrr og við viljum ekki að það falli flóð á órýmd hús,“ sagði Magni í viðtali við fréttstofu. Fram hefur komið að Veðurstofan varaði við aukinni snjóflóðahættu í gær.
Eins og greint hefur verið frá féllu að minnsta kosti þrjú snjóflóð í Neskaupstað í morgun en eitt flóðanna lenti á húsum við Staramýri í bænum. Flóðið var blessunarlega ekki þykkt en féll á miklum hraða á húsin með þeim afleiðingum að gluggar brotnuðu og hurðir sprungu upp.
Mikil mildi þykir að engin alvarleg slys hafi orðið á fólki en í viðtali við RÚV lýsti Anna Björg Rúnarsdóttir Fjeldsted því hvernig snjór hefði rutt sér leið inn í íbúð fjölskyldunnar, sem telur fimm manns. Hún og tvö börn hennar sluppu án meiðsla en maður hennar og dóttir hlutu áverka sem hlúð var að á spítala bæjarins.
