„Feðraveldið hefur alltaf reynt að spila á femíníska aðferðafræði, notfæra sér þær leiðir sem verið er að fara hverju sinni og skrumskæla þær með einhverjum hætti. Í dag eru gerðar tilraunir til að slaufa femínistum (til baka) fyrir glæpsamlegt athæfi, þó ásakanirnar séu illa rökstuddar, glæpirnir óljósir og jafnvel bara alls ekki til staðar,“ segja baráttukonurnar og feministarnir Hildur Lilliendahl Viggósdóttir og Sóley Tómasdóttir, í grein sem birtist á Vísi í kvöld.
Greinin er viðbragð við opnu bréfi Frosta til fjölmiðilsins Heimildarinnar, sem Frosti birti á Vísi í morgun. Þar sakar hann Eddu Falak um að hafa ítrekað logið til um starfsferil sinn í Danmörku í viðtölum við fjölmiðla og krefst hann viðbragða frá Heimildinni vegna þessa.
Hvorki Edda né Heimildin hafa svarað ásökunum Frosta, sem skrifaði meðal annars: „Edda segist hafa fengið skilaboð í vinnunni þess efnis að hún þyrfti að klæða sig öðruvísi ef hún ætlaði að láta taka sig alvarlega. Haft er eftir henni í viðtali á RÚV frá árinu 2021 að þarna hafði fokið í Eddu og hún mótmælt. Hún tjáði skoðanir sínar á þessu óréttlæti á Instagram og má segja að þannig hafi barátta hennar hafist.“ – Hann staðhæfir síðan að eftirgrennslanir hans hafi leitt í ljós að Edda hafi aldrei starfað á þeim vinnustað þar sem hún segist hafa orðið fyrir ofannefndri framkomu.
Eins og flestir vita sakaði fyrrverandi kærasta Frosta hann um andlegt ofbeldi og hótanir í kjölfar sambandsslita þeirra er hún steig fram í viðtali við Eddu Falak árið 2012. Í kjölfarið missti Frosti starf sitt hjá Sýn. Hann hefur núna stofnað hlaðvarpsveituna Brotkast.
„Þetta er ekki í fyrsta skipti sem ranghugmyndum samfélagsins um fortíð eða nútíð femínista er beitt markvisst til þess að draga úr trúverðugleika þeirra og þagga niður í þeim. Af því höfum við báðar reynslu, rétt eins og aðrar konur sem hafa staðið í stafni femínísks aktívisma á Íslandi,“ segir þær Hildur og Sóley í grein sinni. Segja þær málflutning Frosta vera dæmi um ódýra leið til að reyna að óvirkja feminíska baráttukonu:
„Feðraveldið hefur alltaf reynt að spila á femíníska aðferðafræði, notfæra sér þær leiðir sem verið er að fara hverju sinni og skrumskæla þær með einhverjum hætti. Í dag eru gerðar tilraunir til að slaufa femínistum (til baka) fyrir glæpsamlegt athæfi, þó ásakanirnar séu illa rökstuddar, glæpirnir óljósir og jafnvel bara alls ekki til staðar.
Þetta er ansi ódýr leið, enda er að sjálfsögðu hægt að finna eitthvað hjá öllu fólki sem hægt er að skekkja, ýkja og breyta til þess að búa til hentuga útgáfu af sannleikanum. Svo má hleypa sögunni út í litlum skömmtum og dreifa brauðmolum fyrir almenning og óvandaða fjölmiðla að elta. Það má halda hótununum yfir höfði femínistanna sem á endanum brenna upp og hætta. Af því að eins og Cynthia Enloe sagði svo eftirminnilega, „feðraveldið þrífst á kulnun kvenna“.“
Þær segja að þetta sé staðan núna. Núna sé Edda Falak orðin skotmark feðraveldisins:
„Eddu Falak skal refsað, henni skal gert að biðjast afsökunar á tilveru sinni, hún skal leiðrétta einhverjar meintar rangfærslur og útskýra fortíð sína án þess að nokkuð liggi fyrir um hver mistök hennar eru. Hún, sem hefur verið í stafni femínísks aktívisma undanfarin misseri, skuldar allt í einu þjóðinni nákvæmar skýringar á náms- og starfsferli sínum af því að einhver maður með youtube-rás hefur ákveðið að krefjast þess. Hún skal, og jafnvel vinnuveitendur hennar líka, beygja sig í duftið og biðjast auðmjúklega afsökunar á einhverju og svo kemur bara í ljós seinna hverju verður haldið fram gegn henni. Og þá byrjar ballið upp á nýtt.“
„Það hvort Edda Falak vann í banka eða bakaríi skiptir engu andskotans máli,“ segja höfundar og telja þær að málflutningur Frosta sé dæmigerð ofbeldistaktík feðraveldisins. „Ef hún beitir eigin hyggjuviti til að frásagnir hennar um kynbundið ofbeldi og áreitni séu ekki rekjanlegar til tiltekinna staða eða manna er hún að tryggja eigið öryggi, ekki að blekkja almenning. Það er hennar skýlausi réttur og það er óþolandi að við þurfum að skrifa blaðagrein til að útskýra það,“ segja þær ennfremur.
