Kona féll í gærmorgun niður í gilið við fossinn Glym í Hvalfirði og lét lífið. Um var að ræða ferðamann. Lögreglan á Vesturlandi greinir frá þessu.
Í tilkynningu lögreglu kemur fram að fallið úr gilinu var mjög hátt og konan lést samstundis. Tilkynningin er eftirfarandi:
„Um hálf ellefu í gærmorgun barst lögreglu tilkynning um að erlendur ferðamaður hafi fallið niður í gilið við fossinn Glym í Hvalfirði.
Lögreglan á Vesturlandi ásamt sjúkraliði og fjölmennu liði frá björgunarsveitunum fóru á vettvang ásamt því að þyrla Landhelgisgæslunnar var kölluð út.
Aðstæður voru erfiðar á vettvangi og fóru björgunarsveitarmenn upp gilið og komu að þar sem kona á þrítugsaldri fannst látin. Hún ásamt maka sínum höfðu verið tvö á gönguferð upp með gilinu að ofanverðu við Glym og hún fallið fram af brúninni. Fallið var mjög hátt og ljóst að konan lést samstundis.
Rannsóknardeild lögreglunnar á Vesturlandi vinnur að rannsókn málsins.
Lögreglan á Vesturlandi vill koma framfæri þökkum til allra þeirra sem komu að björgunaraðgerðum.“