„Landráð“ og „tilraun til að gera út af við Wagner“. Þetta sagði Yevgeni Prigozhin, eigandi Wagner-málaliðahópsins, fyrir ekki svo löngu. Hann hefur veist harkalega að rússneska varnarmálaráðuneytinu og Sergei Shoigu, varnarmálaráðherra, og Valery Gerasimov, yfirmanni herráðsins.
Prigozhin sakaði þá um að vinna gegn Wagner og stríðsrekstrinum, meðal annars með því að vilja ekki láta Wagner skotfæri í té. Þessi ummæli féllu samhliða því að málaliðar Wagner-hópsins urðu sífellt mikilvægari fyrir stríðsrekstur Rússa, ekki síst í orustunni um Bakhmut.
Nú eru Shoigu og Gerasimov tilbúnir með hefndina að sögn bandarísku hugveitunnar Institute for the Study of War (ISW). Segir hugveitan að barátta varnarmálaráðuneytisins og Prigozhin hafi líklega náð hámarki í tengslum við orustuna um Bakhmut.
Segir ISW að hin hefðbundna rússneska hernaðarelíta, með Shoigu og Gerasimov í fararbroddi, ætli að nýta sér mikinn liðsafla Wagner í Bakhmut til að „veikja stöðu Prigozhin“ og gera út af við metnað hans um að komast til meiri áhrifa í Kreml.
ISW segir að Shoigu og Gerasimov muni ískaldir láta málaliða Prigozhin vera í fararbroddi í orustunni um Bakhmut. Það mun hafa gríðarlegt mannfall í för með sér fyrir Wagner. Með þessu munu Shoigu og Gerasimov slá tvær flugur í einu höggi. Ná Bakhmut á vald Rússa og láta Wagner-hópnum blæða svo illa að hann og þar með Prigozhin, missa áhrif sín í Kreml.