Þann 15. nóvember verður aðalmeðferð við Héraðsdóm Reykjavíkur í afar viðamiklu og óhugnanlegu barnaníðsmáli. Maður er þar sakaður um fjölmörg brot gegn stúlkubarni yfir 11 ára tímabil, frá 2001 til 2012.
Aldur stúlkunnar er ekki gefinn upp í nafnhreinsaðri ákæru héraðssaksóknara til fjölmiðla en ráða má af ákæruliðum, þar sem meðal annars er ákært fyrir barnaverndarlagabrot, að stúlkan hafi verið undir lögaldri allt tímabilið. Það er þó ekki staðfest.
Ákæruliðirnir eru alls sex en í þeim fyrsta er maðurinn sakaður um nauðgun og kynferðisbrot gegn barni með því að hafa í ótilgreindan fjölda skipta á tímabilinu 2001 til 2005 haft samræði og önnur kynferðismök við stúlkuna á heimili mannsins. Er maðurinn þar sagður hafa nýtt sér yfirburði sína gagnvart stúlkunni og traust hennar og trúnað. Brotin í þessum ákærulið eru afar gróf.
Í öðrum ákærulið er maðurinn sakaður um að hafa berað sig fyrir stúlkunni og sýnt henni klámfengið myndefni, „sem sýndi fólk meðal annars hafa samræði og sagt henni að þetta myndu þau gera einn daginn,“ eins og segir í ákæru.
Í þriðja ákærulið er maðurinn sakaður um tilraun til að nauðga stúlkunni árið 2007, auk þess að gefa henni áfengi. Átti þessi háttsemi sér stað á heimili mannsins en stúlkan flúði undan manninum og læsti sig inni á baðherbergi íbúðarinnar.
Í fjórða ákærulið segir að maðurinn hafi frá hausti 2007 og fram í janúar 2008 nauðgað stúlkunni með því að nýta sér yfirburði hennar og traust hennar og trúnað.
Í fimmta lið er maðurinn ákærður fyrir fjölda tilvika af kynferðislegri áreitni við stúlkuna á árunum 2007 til 2012, meðal annars með káfi og sendingum á kynferðislegum SMS-skilaboðum.
Í sjötta og síðasta ákærulið er maðurinn sakaður um tilraun til nauðgunar gegn stúlkunni í bíl. Reyndi hann meðal annars að láta stúlkuna hafa við sig munnmök er hann tók út getnaðarlim sinn og þrýsti höfði hennar niður að honum.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd stúlkunnar er gerð krafa um miskabætur upp á sjö milljónir króna.
Sem fyrr segir verður aðalmeðferð í málinu við Héraðsdóm Reykjavíkur þann 15. nóvember. Þinghald verður lokað.
