Vladimir Pútín, Rússlandsforseti, rauf í gær loks þögnina um meintan dauða Yevgeny Prigozhin, stofnanda Wagner-herdeildarinnar og náinn samstarfsmann sinn til margra ára, í dularfullu flugslysi í grennd við Moskvu á miðvikudaginn.

„Í fyrsta lagi vill ég votta aðstandendum hinna látnu samúð mína. Svona lagað er alltaf mjög sorglegt,“ sagði forsetinn í stuttu ávarpi hans til blaðamanna.

Allar líkur eru taldar á því að Prigozhin og nokkrir nánir samstarfsmenn hans hafi verið um borð í vélinni en þó liggur ekki enn fyrir hvernig hún fórst.

Pútín talaði um Prigozhin í þátíð og benti á að þeir hefðu þekkst lengi. Sagði Rússlandsforseti að Prigozhin hefði verið „hæfileikaríkur maður“, sérstaklega í viðskiptum, sem hefði þó gert „alvarleg mistök í lífinu“.

Eins og frægt var eru rúmir tveir mánuðir síðan að Prigozhin blés til snarprar uppreisnar í Rússlandi og sneri málaliðaher sínum gegn yfirvöldum í Rússlandi. Hann náði svo samkomulagi við Pútín um að leggja niður vopn en flestir voru á því að Rússlandsforsetinn myndi þó aldrei fyrirgefa svikin.

Samúðarkveðja Pútíns þykir því nokkuð kaldhæðnisleg í ljósi þess að nánast öll heimsbyggðin er sannfærð um að hann beri ábyrgð á því að Prigozhin hafi verið komið fyrir kattarnef. Þar með bætist nafn Wagnerleiðtogans við langan lista einstaklinga sem talið er að Pútín hafi látið losa sig við.

Engar sannanir liggja þó fyrir um aðild rússneskra yfirvalda að slysinu og enn er of snemmt að fullyrða um hvort að vélin hafi verið skotin niður, henni hafi verið grandað með sprengju um borð eða þá að einhver önnur skýring sé á brotlendingunni.