Lögreglan á Vesturlandi hefur staðfest í samtali við mbl.is að meint líkamsárás með dráttarvél sem átti sér stað í Dalasýslu á föstudag sé komin á hennar borð. Lögregla segist þó ekki hafa haft veður af málinu fyrr en í dag. Sá sem varð fyrir árásinni, Skúli Einarsson, tilkynnti þó atvikið í samskiptamiðstöð lögreglu á föstudag.

DV greindi frá málinu á mánudagskvöld:

Sjá einnig: Nýjar vendingar í Lambeyradeilunni – Föðurbróðir Ásmundar ráðherra sakaður um líkamsárás með dráttarvél

Um er að ræða nýjustu vendingarnar í deilu fjölskyldu Ásmundar Einars Daðasonar ráðherra, en sá sem sakaður er um að hafa ekið á Skúla Einarsson, er Valdimar Einarsson. Báðir eru föðurbræður hans en faðir hans er Daði Einarsson, sem leikur stórt hlutverk í þessari deilu, sem snýst meðal annars um eignarhald á jörðinni Lambeyrar.

 Sjá einnig: Hatrammar ættardeilur Ásmundar afhjúpaðar – Sólundaður föðurarfur, myrkraverk, ofsóknir og ráðherra staðinn að innbrotum sem löggan lét slæda

Aðdragandinn að meintri árás á föstudag var sá að Skúli Einarsson gleymdi tösku sinni á fjölskyldufundi sem haldinn var í deilunni að Dönustöðum á fimmtudaginn. Morguninn eftir komst hann að því að taskan var í vörslu bróður hans, Valdimars, sem hafði ekki skilað honum henni þrátt fyrir tækifæri til þess. Í töskunni voru fartölva Skúla og viðkvæm gögn.

Skúli ók á föstudaginn með dóttur sinni, Ásu, vestur, til að endurheimta töskuna. Þær tilraunir enduðu með því að Valdimar ók hann niður á dráttarvél sinni. Samkvæmt frétt mbl.is í dag hefur Valdimar ekki fengið töskuna frá Skúla.

Ása hefur áður kært meint skemmdarverk Daða, Valdimars og Ásmundar Daða, ráðherra, og segir hún forkastanlegt að lögregla hafi ekki aðhafst þegar vatnsveita á Lambeyrum var eyðilögð:

„Að þeir skuli ekki hafa mætt þá, það er bara út í hött. Það eru mörg til­vik þar sem eitt­hvað er á gráu svæði, eins og t.d. þegar Daði hef­ur verið að dreifa skít kring­um hús­in og minni­hátt­ar skemmd­ar­verk,“ seg­ir hún og bæt­ir við að syst­urn­ar hafi skiln­ing á því að lög­regl­an geti ekki varið tíma sín­um í öll mál. Öðru gegn­ir hins veg­ar með vatns­veit­una.

„Þetta var meiri­hátt­ar skemmd­ar­verk sem stóð yfir í marga klukku­tíma með stór­virk­um vinnu­vél­um. Lög­regla ber alltaf fyr­ir sig að þetta séu eigna­deil­ur og að hún taki ekki þátt í eigna­deil­um. En það er bara kol­ó­lög­legt að grafa í sund­ur vatns­leiðslur, sama hver á landið.“

Ása segir að málið hafi verið kært til lögreglu og það sé í ferli.