Íslendingar eyddu 2,6 milljörðum króna í maímánuði í erlendri netverslun, sem er aukning um 31,4% á milli ára. Tæplega helmingur af innkaupunum eða rúmlega 1,2 milljarðar króna voru verslaðar í erlendum fataverslunum á netinu. Kemur þetta fram í tilkynningu Rannsóknaseturs verslunarinnar (RSV).

Fyrstu fimm mánuði þessa árs versluðu Íslend­ing­ar fyr­ir rúm­lega tíu millj­arða í er­lendri net­versl­un og er aukningin töluverð frá síðasta ári þegar innkaup sama tímabils voru 9,3 milljarðar. Innanlands versluðu Íslendingar fyrir 17,3 milljarða króna, og er einnig aukning þar frá síðasta ári, þegar verslunin var 15,4 milljarðar.

„Íslend­ing­ar láta eng­an bil­bug á sér finna þrátt fyr­ir stöðuna í sam­fé­lag­inu,“ segir Magnús Sig­ur­björns­son, for­stöðumaður RSV, í sam­tali við Morg­un­blaðið, en að hans mati bitn­ar aukn­ing í er­lendri net­versl­un ekki á inn­lendri versl­un. „Ein leið til að út­skýra þetta er að fólk er að reyna finna sér ódýr­ari föt og hluti á net­inu. Kannski er veðrið bara búið að vera svo leiðin­legt að fólk er meira fyr­ir fram­an tölv­una. Svo virðist sem að net­versl­un inn­an­lands minnki ekki sam­hliða.“

Í flokknum lyf, heilsu- og snyrtivörur hefur verið 90,6% aukning á innkaupum erlendis frá milli ára. Íslendingar virðast fagna auknu framboði af áfengi hér heima en áfengisinnkaup erlendis frá hafa minnkað um 14,6% milli ára.