Lögmaðurinn, sem kærður var fyrir kynferðisbrot gegn eiginkonu skjólstæðings síns, óskaði eftir því í byrjun apríl að kæran á hendur honum yrði rannsökuð sem rangar sakargiftir og tilraun til fjárkúgunar.
Í gögnum málsins sem DV hefur undir höndum, segir að tölvupóstar og önnur samskipti hafi farið á milli vinar eiginmanns konunnar og lögmannsins í hið minnsta á annan mánuð áður en kæran var loks lögð fram um miðjan febrúar. Ítrekar vinur mannsins í þeim samskiptum að hann, fyrir hönd hjónanna, vilji eiga með lögmanninum fund til þess að ræða „framhald málsins.“
Skýrslutökur í málinu fóru fram í lok þess sama mánaðar þar sem lögmaðurinn, sem er með málflutningsrétt fyrir Landsrétti, vísaði í umrædd gögn.
Fyrr í dag sagði Vísir frá því að kæra hafi verið lögð fram gegn lögmanni og að Lögreglan á höfuðborgarsvæðinu væri með málið til flýtimeðferðar vegna starfa lögmannsins sem reglulega er í forsvari í málum sem vekja athygli fjölmiðla.
Fram kemur í gögnum málsins að lögmaðurinn viðurkenni að hafa átt í langvarandi kynferðislegu sambandi við konuna og að það hafi verið með samþykki beggja aðila.
RÚV greindi frá því í hádegisfréttum sínum að samkvæmt kollegum hafi viðkomandi lögmaður ítrekað orðið uppvís að óviðeigandi samskiptum við skjólstæðinga sína og athugasemdir hafi verið gerðar við vinnubrögð hans. Þá stæði til að stjórn Lögmannafélagsins myndi funda um málið í hádeginu en ekkert í siðareglum félagsins segi þó til hvort að slík náin kynni við aðstandenda skjólstæðings séu óæskileg.
