Brotist var inn í Samstöðina, fjölmiðil Sósíalistaflokksins, í nótt og flest öllum tækjum í stúdíói stöðvarinnar stolið og kaplar eyðilagðir. Þetta kemur fram á vef Samstöðvarinnar og segir að dagskrá Samstöðvarinnar muni liggja niðri næstu daga á meðan safnað er fyrir nýjum tækjum.

„Svo sem allt sem við áttum var tekið og svo var annað eyðilagt,“ segir Gunnar Smári Egilsson ritstjóri Samstöðvarinnar. „Þetta voru myndavélar, hljóðmixerar og annað sem við höfum safnað upp á löngum tíma. Ætli tapið séu ekki nokkrar milljónir í peningum talið. Samstöðin er rekin fyrir styrki og stuðning hlustenda í gegnum Alþýðufélagið og á enga digra sjóði að sækja í.“

Segir að ólíklegt sé að innbrotið hafi verið framið í auðgunarskyni. Endursölumarkaður á tækjum sem þessum sé þannig að ólíklegt sé að þjófarnir fengju nema brot af kostnaðinum við að byggja upp stúdíóið. Gunnar Smári segir enn fremur á vef Samstöðvarinnar:

„Ég vildi að ég gæti sagt að við getum byrjað útsendingu strax á mánudag en ég veit bara ekki hvort við ráðum við það. Samstöðin er fátæk og á illa við þessum áföllum. Þau tæki sem voru eyðilögð eða stolið kosta hvert um sig ekki mikið, eru sum gömul og hæpið að við fáum þetta tjón bætt í gegnum tryggingar. Og ef ég þekki tryggingafélögin rétt myndi það taka okkur vikur, mánuði og ár.“