Þann 16. maí næstkomandi verður fyrirtaka í Héraðsdómi Vesturlands í Borgarnesi, í sakamáli sem héraðssaksóknari hefur höfðað gegn manni fyrir tilraun til hlutdeildar í kynferðisbroti gegn barni. Þinghaldið er lokað og hefur verið erfitt að fá upplýsingar um málið. DV hefur óskað eftir afriti af ákæru en var aðeins birtur hluti af ákærutexta. Af honum má ráða að sakborningur hafi fengið konu til að misnota son hennar og sýna honum það í gegnum snjallsíma hennar. Er þetta orðað svo í ákæru:
„Ákærði er sakaður um tilraun til hlutdeildar í kynferðisbroti gegn barni, með því að hafa að kvöldi föstudagsins ……… hvatt …….. til að hafa önnur kynferðismök en samræði við son hennar, …………. með því að biðja hana um að fróa, nudda og strjúka getnaðarlim …….. og sýna ákærða það í gegnum farsíma hennar.
Ákærði neitaði sök við þingfestingu málsins.“
DV hefur ekki upplýsingar um hvort bótakrafa hafi verið gerð fyrir hönd barnsins sem er þolandi í málinu. Ennfremur liggur ekkert fyrir um ákæru gagnvart móðurinni í málinu.
