Þann 27. mars næstkomandi verður fyrirtaka í Héraðsdómi Reykjavíkur í máli gegn Björgvini Sigmari M. Ómarssyni, manni sem fæddur er árið 1986. Ákæran er tvíþætt og varðar annars vegar ofbeldi gegn lögreglumanni aðfaranótt fimmtudagsins 10. júní árið 2021, fyrir utan hús á Flókagötu í Reykjavík. Björgvin er þá sagður hafa sparkað í síðu lögreglumannsins, sem var við skyldustörf, með þeim afleiðingum að hann missti andann stutta stund.
Hins vegar segir í ákærunni, sem gefin var út seint í janúar á þessu ári, að Björgvin hafi skallað lögreglumann í andlitið inni á lögreglustöðinni á Hverfisgötu, með þeim afleiðingum að lögreglumaðurinn hlaut yfirborðsáverka ofan við hægri augabrún. Einnig er Björgvin sagður hafa hótað tveimur öðrum lögreglumönnum ofbeldi á staðnum.
Björgvin er margdæmdur ofbeldismaður en DV fjallaði um mál hans þann 1. júlí í fyrra. Þá hafði hann nýlega verið sakfelldur fyrir 15 brot, meðal annars ofbeldisbrot gegn fyrrverandi sambýliskonu sinni sem hann beitti ítrekað ofbeldi dagana 7. til 10. ágúst árið 2019. Meðal annars setti hann kodda fyrir vit konunnar og reyndi að kæfa hana, og barði hana með kertastjaka. Einnig sló hann höfði hennar utan í vegg og kýldi hana ítrekað með krepptum hnefa víðsvegar um líkamann.
Björgvin var ennfremur sakfelldur fyrir að hafa ráðist að manni með hnífi sumarið 2020 og reynt að stinga hann en árásin átti sér stað í bakgarði skemmtistaðar við Laugaveg. Maðurinn náði að víkja sér undan atlögum hans.