Í gær var tilkynnt um mann sem kraup á skeri við strandlengjuna í Garðabæ. Sjónarvottar sögðu að maðurinn hefði staðið á skerinu, beygt sig niður og síðan horfið. Lögreglumenn sáu skóför í snjónum á milli strandar og skers og benti ekkert til að maðurinn hefði gengið til baka frá skerinu.

Lögreglumenn kölluðu því þyrlu LHG út auk sérsveitar ríkislögreglustjóra og kafarahóp frá Slökkviliði höfuðborgarsvæðisins.

Skömmu eftir að óskað var eftir aðstoðinni rákust lögreglumenn á mann á gangi við ströndina. Reyndist það vera maðurinn sem leitað var að. Hann sagðist hafa farið út á skerið en hefði ekki dottið í sjóinn. Hafi aðeins kropið á skerinu til að taka ljósmyndir af ísnum sem hafði myndast á því. Frekari aðstoð var því afþökkuð.

Í Hafnarfirði var tilkynnt um grímuklæddan mann að sniglast í húsagarði. Hann flúði þegar hann sá öryggismyndavélar. Lögreglan fór á vettvang og ræddi við þennan aðila sem reyndist vera erlendur ferðamaður í leit að AirBnB íbúð sinni.

Í Grafarvogi var tilkynnt um mann að klifra yfir svalahandrið í séreign fjölbýlishúss. Þarna reyndist um íbúa í húsinu að ræða. Hafði hann gleymt lyklunum sínum og því vippaði hann sér yfir handriðið og komst inn um svalahurð.