Ekki sér fyrir endann á magnaðri ritdeildu auðkýfingsins Elon Musk og íslenska frumvöðulsins Haraldar Inga Þorleifssonar á Twitter. Elon segir Harald vera að sækjast eftir hárri peningagreiðslu með framgöngu sinni á Twitter í dag.
Aðdragandi málsins er sá að Haraldur, sem var til skamms tíma starfsmaður Twitter í kjölfar þess að hann seldi Twitter fyrirtæki sitt Ueno, spurði auðkýfinginn hreint út hvort væri enn starfsmaður fyrirtækisins eða ekki. Fyrir skömmu var lokað á aðgang Haraldar að kerfum fyrirtækisins en hann hefur ekki fengið það staðfest hjá mannauðsdeildinni hvort honum hafi verið sagt upp eða ekki.
Skeytin hafa síðan gengið á milli mannanna í dag og samskipti þeirra vakið heimsathygli. Haraldur á inni háar samningsbundnar greiðslur frá Twitter vegna sölunnar á Ueno, starfsframlag hans var hluti af þeim samningi, en nú óttast Haraldur að Elon ætli ekki að standa við gerða samninga.
Elon segir í nýlegu tísti að Haraldur sé með stóran og virtan Twitter-reikning og hann sé auðugur. Ástæðan fyrir því að hann hafi sótt að sér opinberlega sé sú að hann sé að sækjast eftir hárri peningagreisðlu. Hann hafi hins vegar skilað lítilli sem engri vinnu fyrir fyrirtækið síðustu fjóra mánuði. Tístið frá Elon verður síðan enn skrýtnara er hann heldur því fram að Haraldur hafi komið sér undan vinnu með þeirri afsökun að hann gæti ekki slegið á lyklaborð en núna sé hann að búa til Twitter-storm á lyklaborðinu sínu.
Haraldur virðist svara þessum skeytasendingum með myndbandi sem sýnir mann níðast á asna og hefnast illilega fyrir.
— Halli (@iamharaldur) March 7, 2023
