Sextíu og tveggja ára gamall karlmaður hefur verið ákærður fyrir umferðar- og hegningarlagabrot vegna skuggalegs atviks sem átti sér stað í Hamarsfirði, þann 1. febrúar árið 2022. Í ákæru málsins, sem DV hefur undir höndum, er maðurinn sakaður um að hafa á ófyrirleitinn hátt stofnað lífi og heilsu konu og karls í augljósa hættu. Fólkið var í öðrum bíl og er maðurinn sakaður um að keyrt viljandi aftan á þau á mikilli ferð. Verknaðurinn er sagður hafa verið algjörlega tilefnislaus.

Hamarsfjörður er nálægt Djúpavogi en í ákæru er sagt að hinn ákærði hafi ekið norður þjóðveg nr. 1 frá Hornafirði og hann hafi verið í sunnanverðum Hamarsfirði, nokkru sunnan við brúna yfir Hamarsá, er atvikið varð.

Í ákæru kemur einnig fram að maðurinn ók undir miklum áhrifum áfengis og mældist vínandamagn í blóði 1,99‰ (prómil).

DV hafði samband við karlmanninn sem var í bílnum sem ekið var á. Hann segir að hann og konan sem var með honum hafi lengi verið með eymsli og stirðleika í hálsi eftir atvikið, hann hafi að mestu náð sér af þeim meiðslum en konan ekki. Maðurinn glímir enn við andleg eftirköst atviksins. „Ég er ennþá hræddur við stóra bíla,“ segir hann.

„Við upplifðum þetta sem morðtilraun,“ segir hann ennfremur en hann óttaðist þau lentu út af og í Hamarsánni. Hann lýsir því stuttlega hvernig ákærði ökumaðurinn hafi fengið þau til að taka fram úr sér og síðan hafi hann ekið aftan á þau á miklum hraða:

„Hann var greinilega mjög drukkinn og við vildum ekki fara fram úr honum, en hann gaf stefnumerki og bauð okkur að fara fram úr sér.“ Síðan hafi hann ekið á miklum hraða aftan á þau.

Maðurinn segir að hann og konan sem var með honum í bílnum þekki ekkert til ökumannsins en hann hafi greinilega gert þetta með fullum ásetningi.

Héraðssaksóknari krefst þess að maðurinn verði dæmdur til refsingar, sviptingar á ökurétti og greiðslu alls sakarkostnaðar.

Gerðar eru einkaréttarkröfur fyrir hönd konunnar og mannsins sem urðu fyrir ákeyrslunni og krefst hvort um sig tveggja milljóna króna í miskabætur.

Fyrirtaka verður í málinu við Héraðsdóm Suðurlands þann 2. mars næstkomandi.