Á kvöld- og næturvakt lögreglunnar á höfuðborgarsvæðinu bar það helst til tíðinda að við hefðbundið eftirlit með ökumönnum kom í ljós að einn dvelur ólöglega hér á landi. Í bifreið hans fundust ávana- og fíkniefni. Hann var handtekinn og vistaður í fangageymslu.

Beðið var um aðstoð í kvikmyndahús í borginni en þar hafði maður læst sig inni á salerni. Lögreglunni tókst að koma honum út.

Í Kringlunni voru tveir handteknir eftir að þeir réðust á þriðja aðilann. Þolandinn fór á bráðamóttöku.

Í Miðborginni hafði lögreglan afskipti af bar sem var opinn lengur en heimilt er samkvæmt rekstrarleyfi hans. Mikinn tónlistarhávaða lagði frá staðnum og talsverður fjöldi fólks var inn á staðnum. Starfsfólki var gert að loka staðnum strax.

Þrír ökumenn voru handteknir grunaðir um að vera undir áhrifum áfengis og/eða fíkniefna.

Einn ökumaður var kærður fyrir að aka sviptur ökuréttindum.