Í gær birti DV frétt um skelfilega bakteríu sem fannst nýlega í einu mest notaða sýklalyfinu í Danmörku.
„Það er hræðilegt að hugsa um hversu margir hafa tekið þetta lyf og eru hugsanlega smitaðir.“ Þetta sagði Charlotte Nielsen Agergaard, deildarlæknir á örverudeild háskólasjúkrahússins í Óðinsvéum í Danmörku.
Vísað var til fréttar TV2 sem hafði eftir Agergaard að það megi ekki gerast að fólk taki lyf, sem læknir hefur ávísað því, sem það hefur keypt í dönsku apóteki og eigi á hættu að smitast af fjölónæmri bakteríu. Agergaard komst að því að í sýklalyfinu Dicillin frá svissneska lyfjafyrirtækinu Sandoz eru bakteríur sem eru ónæmar fyrir fjölda sýklalyfja. Um 35.000 Danir hafa fengið lyfinu ávísað frá í september og fram í desember samkvæmt gögnum frá heilbrigðisyfirvöldum.
Danskir læknar fundu skelfilega bakteríu – Mörg þúsund manns eru hugsanlega smitaðir
Dicillin er ekki í sölu hérlendis.
Sama dag og frétt TV2 birtist barst tölvupóstur frá Lyfjastofnun til apóteka hérlendis þar sem tilkynnt var að möguleiki væri á að sýklalyfið Staklox 500 mg yrði innkallað. Í tölvupóstinum kom fram að markaðsleyfishafi lyfsins myndi ákveða daginn eftir, 9. febrúar, hvort innköllunin nái einnig til einstaklinga sem hafa fengið lyfið afhent.
„Ástæða innköllunarinnar er að nokkrir einstaklingar í Danmörku hafa sýkst af fjölónæmu bakteríunni Enterobacter Hormaechi. Rannsókn leiddi í ljós að ein framleiðslugeta af Dicillin innihélt þessa bakteríu, lotu sem aðeins var dreift í Danmörku. Rannsókn hafi sýnt að mengun gæti átt við aðrar lotur af lyfinu og því hafi allar lotur Dicillin verið innkallaðar hjá einstaklingum í Danmörku,“ segir meðal annars í tölvupóstinum sem DV hefur undir höndum.
Lyfið Staklox, sem selt er hér á landi eins og áður segir, er frá sama framleiðanda og lyfið Dicillin, sem einstaklingar sýktust af í Danmörku. „Það hefur ekki verið útilokað að lotur af Staklox geti verið mengaðar af umræddum bakteríum.“
Eftir hádegi í dag barst annar tölvupóstur frá Lyfjastofnun þar sem kemur fram að yfirvofandi er innköllun á lyfinu Staklox 500 mg hylkjum til sjúklinga. Í tölvupóstinum, sem DV hefur undir höndum, fylgja leiðbeiningar um hvernig á að taka á lyfinu sem einstaklingar skila og hvaða lyf eigi að afhenda þeim í staðinn.
Í niðurlagi tölvupóstsins segir: „Þeir einstaklingar sem hafa lokið Staklox lyfjameðferð og hafa engin einkenni um sýkingu þurfa ekki að grípa til neinna aðgerða á þessari stundu. Þeir einstaklingar sem hafa lokið Staklox lyfjameðferð og eru með sýkingu, t.d. blöðrubólgu skulu hafa samband við lækni.“
Rétt í þessu barst eftirfarandi tölvupóstur frá Lyfjastofnun þar sem segir:
Lyfjastofnun vekur athygli á eftirfarandi upplýsingum. Þess er góðfúslega farið á leit við fjölmiðla að koma upplýsingunum í dreifingu sem fyrst svo þau nái til þeirra sem málið varðar.
Markaðsleyfishafi Staklox (500 mg hylki) hefur innkallað lyfið til sjúklinga. Þeir sjúklingar sem eru í sýklalyfjameðferð í dag með Staklox eru beðnir að skila lyfinu í næsta apótek sem fyrst. Annað lyf verður afhent í staðinn einstaklingum að kostnaðarlausu. Mikilvægt er að halda lyfjameðferð áfram samkvæmt leiðbeiningum. Þeir sem eiga afgangs Staklox birgðir eru einnig beðnir um að skila þeim í apótek.
Öll apótek í landinu eru upplýst um málið og hafa fengið leiðbeiningar frá markaðsleyfishafa Staklox og Lyfjastofnun um hvernig standa eigi að skiptum til einstaklinga. Á meðan á rannsókn málsins stendur er tryggt að Staklox sé ekki dreift til apóteka, heilbrigðisstofnana og einstaklinga. Önnur lyf sem innihalda dicloxacillin og eru á markaði á Íslandi eru ekki framleidd af sama fyrirtæki og því nær innköllunin ekki til þeirra.
Nánari upplýsingar á vef Lyfjastofnunar, þar sem jafnframt verður miðlað frekari upplýsingum um innköllunina, eins og þörf krefur.
