Hundurinn Vera og hvolpurinn hennar Snow sluppu frá heimili sínu í Reykjanesbæ síðastliðið föstudagskvöld. Nokkrum klukkustundum eftir að mæðginin týndust sást til þeirra við Grænás í bænum og um nóttina við verslun Nettó við Iðuvelli. Um hálftíma eftir að hundarnir sáust við Iðuvelli sást manneskja taka Veru upp í bíl en síðan hefur ekki sést til hennar. Snow fannst í gær við flugvöllinn en ennþá hefur ekkert spurst til Veru.

Fréttablaðið fjallar um málið og ræðir við Eygló Önnu Guðlaugsdóttur, sjálfboðaliða á vegum Dýrfinnu, en grunur liggur á að manneskjan sem tók Veru upp í bílinn hafi gert það af ásettu ráði og sé nú að bíða eftir því að boðin verði fundarlaun fyrir hana.

„Við höfum séð svona mál áður, á þessu svæði. Þar var silkiterrier tík sem týndist í rigningu en birtist svo allt í einu þurr, tandurhrein og í góðum holdum á eina gangstéttina í Reykjanesbæ. Að öllum líkindum er fólk að taka hundinn heim og bíða þess að boðin séu fundarlaun,“ segir Eygló í samtali við Fréttablaðið.

Að sögn Eyglóar eru oft boðin há fundarlaun fyrir hunda sem finnast ekki. Sú er raunin fyrir Veru líka en eigendur hennar vonast til að sá sem tók hana gefi sig fram við það. Vera var tekin í kringum svæði sem kallast Hólmgarður en ef svo vill til að einhver á svæðinu er með myndavélar þá segir Eygló að Dýrfinna myndi þyggja aðstoð frá viðkomandi.