Loftslagið á norðurheimsskautasvæðinu fer hlýnandi og það veldur mörgum lífverum vandræðum. Þar á meðal eru ísbirnir sem eiga orðið í erfiðleikum með að veiða sér seli til matar vegna minna ísmagns. En hreindýr á Svalbarða virðast vera að laga sig að loftslagsbreytingunum og dafna ágætlega.

The Guardian segir að hækkandi hitastig hafi örvað vöxt gróðurs á Svalbarða og það hafi komið hreindýrum til góða. Þau hafi nú lengri tíma en áður til að byggja upp fituforða. Einnig virðast þau vera að breyta mataræði sínu yfir í neyslu á „íspinnalíku“ grasi sem stendur upp úr ís og snjó.

Hreindýrin á Svalbarða eru minni og bústnari en ættingjar þeirra annars staðar. Þau halda til á nær öllum þeim svæðum á Svalbarða sem eru íslaus.

Fréttir hafa borist af fjöldadauða hreindýra í Rússlandi af völdum hungurs og að dýrum fari fækkandi í Kanada og Alaska. Af þessum sökum hafa margir haft áhyggjur af framtíð hreindýranna á Svalbarða en þær áhyggjur virðast með öllu óþarfar því stofninn á Svalbarða virðist dafna vel.

Vísindamenn við Oulu háskólann í Finnlandi rannsökuðu mataræði hreindýranna á Svalbarða til að kanna af hverju þeim fer fjölgandi. Blóðsýni voru tekin úr þeim og út frá þeim var hægt að sjá hvað dýrin höfðu étið dagana á undan.

Rannsóknin hefur verið birt í vísindaritinu Global Change Biology. Í henni kemur fram að frá 1995 til 2012 hafi mataræði hreindýranna breyst og þau hafi dregið úr áti á mosa og byrjað að éta meira af „graslíkum“ plöntum. Þær eru orðnar aðgengilegri en áður vegna loftslagsbreytinganna.