Klukkan 18 í gær var tilkynnt um menn sem voru að brjóta rúðu í húsi í Grafarvogi. Þeir voru farnir af vettvangi þegar lögreglan kom.
Í Miðborginni olli maður tjóni á bifreiðum á bifreiðastæði á tíunda tímanum í gærkvöldi með því að berja í þær. Hann var farinn af vettvangi þegar lögreglan kom.
Á ellefta tímanum var tilkynnt um þrjá menn á ferð í Miðborginni og að einn þeirra hefði brotið rúðu. Þeir forðuðu sér af vettvangi áður en lögreglan kom.
Um klukkan fjögur í nótt var rúða brotin í verslun í Miðborginni.
Einn var handtekinn síðdegis í gær eftir að tilkynnt var um ósæmilega hegðun hans. Hann neitaði að veita persónuupplýsingar og var því handtekinn. Þegar á lögreglustöðina var komið var hann reiðubúinn til að veita umbeðnar upplýsingar og var sleppt lausum að því loknu.
Á níunda tímanum var skriðdýr handsamað á heimili einu á höfuðborgarsvæðinu. Dýr af þessari tegund er óheimilt að halda hér á landi. Starfsmaður sveitarfélagsins fjarlægði dýrið.