Þetta sagði forsetinn í gær að sögn Reuters. Hann sagði að ef hernámsliðið haldi áfram þeirri stefnu sinni að efna til atkvæðagreiðslna loki það um leið á möguleikann á viðræðum við Úkraínu og hinn frjálsa heim en það sé eitthvað sem Rússar muni hafa þörf fyrir á einhverjum tímapunkti.
Rússar og aðskilnaðarsinnar hafa hertekið stór landsvæði í austurhluta Donbas og í suðurhluta landsins. Á mörgum þessara svæða eru Rússar nú sagðir undirbúa atkvæðagreiðslur um aðskilnað frá Úkraínu. Fáum dylst þó að slíkar atkvæðagreiðslur verða sviðsettar og úrslitin ákveðin fyrir fram.
„Afstaða okkar er eins og áður. Við munum ekki láta neitt af hendi sem við eigum,“ sagði Zelenskyy.
Fulltrúar ríkjanna hafa ekki ræðst við síðan í lok mars nema hvað þeir sömdu um útflutning á korni frá Úkraínu.