Þann 11. ágúst næstkomandi verður þingfest við Héraðsdóm Reykjaness mál gegn ítölskum manni sem setið hefur í fangelsinu Hólmsheiði frá því seint í apríl.

DV hefur ákæruna í málinu undir höndum. Maðurinn heitir Lorenzo Tisi og er rétt tæplega 65 ára gamall. Hann er sakaður um að hafa staðið að innflutningi á tæpu kílói af kókaíni með 76-77% styrkleika, sem samsvarar 85-86% kókaínklóríði, ætluðu til söludreifingar hér á landi í ágóðaskyni. Áætlað söluverðmæti er í kringum 20 milljónir króna. Maðurinn faldi fíkniefnin í niðursuðudósum í ferðatösku sinni í flugi frá Brussel í Belgíu til Íslands. Kom hann til landsins þann 22. apríl síðastliðinn.

Þess er krafist að maðurinn verði dæmdur til refsingar og greiðslu alls sakarkostnaðar.