Gunnar Ingi Gunnarsson, skotvopnaeigandi og veiðimaður, telur að endurskoðun skotvopnalaga sé ekki endilega farsælasta leiðin til að koma í veg fyrir skotárásir hér á landi. Frekar ætti að bæta aðgang að sálfræðingum og geðlæknum.
Þetta kemur fram í grein sem hann skrifar á Vísir.is í dag undir yfirskriftinni „Skotvopnalögin og endurskoðun.“
Gunnar byrjar á að benda á að Katrín Jakobsdóttir tali um nauðsynlega endurskoðun laganna vegna þeirra skotvopnaárása sem hafa verið hér á landi síðustu ár.
„Yfirskin breytinga á lögum eingöngu til breytinga þjónar engum tilgangi og hvað þá að breyta lögunum vegna atburða sem tengjast gjörðum mikið andlega veikra einstaklinga og vegna einhvers sem gerist á erlendri grundu, allt einstaklingar sem áttu við alvarleg geðræn vandamál að stríða,“ segir hann.
Gunnar segist fagna endurskoðun á skotvopnalögum „en að hafa sem ástæðu að skoðunin sé vegna gjörða tveggja (síðastliðið ár) geðveilla einstaklinga og skotárása í öðrum löndum er fásinna. Nær væri og mikilvægara væri að laga aðgang þessara einstaklinga að sálfræðingum og geðlæknum, setja meiri fjármuni í geðheilbrigði í landinu,“ segir hann og mælir með grein sem Grímur Atlason, framkvæmdarstjóri Geðhjálpar skrifar á Vísir.is í gær: „Orsakir í stað afleiðinga – hættum að vera hrædd“
„Að þrengja skotvopnalögin vegna einangraðra atburða og þekkingarleysis sem hugsanlega mun leiða til þess að einstaklingar neyðast til að gefa frá sér t.d. erfða grip er ekki af hinu góða og í minnsta lagi sagt vanhugsað. Er í raun álíka gáfulegt og að banna rafbíla á íslandi út af því að það kveiknaði í nokkrum í Bandaríkjunum og Evrópu,“ segir Gunnar.
