Í nýjustu stöðuskýrslu bandarísku hugveitunnar Institute for the Study of War (ISW) kemur fram að fjölskyldum látinna sjóliða hafi verið hótað af yfirvöldum. Þeim var að sögn hótað að þær verði sviptar þeim fjárhagslegu bótum sem þær eiga að fá ef þær ræða opinberlega um Moskvu og það sem gerðist.
ISW hefur þessar upplýsingar frá úkraínsku leyniþjónustunni en Rússar hafa ekki staðfest þetta.
Leyniþjónusta úkraínska hersins segir að rússnesk yfirvöld hafi sent lögmenn og sálfræðinga til að sannfæra fjölskyldur hinna látnu hermanna um að halda öllum upplýsingum um dauða þeirra leyndum. Þetta er að sögn gert til að koma í veg fyrir óróleika í samfélaginu vegna hins mikla mannfalls rússneska hersins í stríðinu.
