DV - Frjáls og óháður miðill

Tarot Spil á DV

Smelltu hér til að sjá spádóm þinn í dag

Fimmtudagur 18.apríl 2024

Fréttir

„Þakklátur fyrir að vera á lífi“ – Feðgar urðu fyrir skotárás í Hafnarfirði

Rafn Ágúst Ragnarsson
Fimmtudaginn 23. júní 2022 21:08

Mateusz Dariusz Lasek var að fara með son sinn Jakub Mateusz á leikskólann Víðivelli í Hafnarfirði í gær þegar skotið var á bíl þeirra. Maður situr nú í varðhaldi grunaður um að hafa skotið á tvo bíla á miðvikudagsmorgun úr íbúð í fjölbýlishúsi við Miðvang, en maðurinn gaf sig fram við lögreglu eftir margra klukkutíma umsátur sérsveitar um húsið.

Mateusz hefur búið á Íslandi í 11 ár og er lærður bifvélavirki. Hann og kona hans eiga tvö börn, eina dóttur sem er eins árs og svo einn sex ára son sem var í aftursæti bílsins þegar árásin átti sér stað.

„Hann hélt að ég væri einhvers konar glæpamaður“

„Svo heyrði ég einhvers konar smell. Fyrst hélt ég að þetta væru einhver hljóð í bílnum, að eitthvað skemmdist. Smellurinn var ekki mjög hár en vel heyranlegur. Nokkrum sekúndum síðar heyrði ég annan smell en hærri og svo fann ég fyrir gleri rigna á bakið og höfuðið á mér. Ég opnaði hurðina og steig úr bílnum til að athuga hvað skeði, hvort það hafi verið einhver að kasta stein í rúðuna eða hvað. Þá sá ég mann á svölum með langa byssu og hann var að miða á bíllinn okkar. Ég hrópaði á hann „hvað ertu að gera?“ og „hættu þessu“ og sagði að ég ætlaði að hringja í lögreglu. Svo hringdi ég strax í lögreglu. Það var hvort sem er enginn annar á bílastæðinu nema við feðgarnir,“ sagði Mateusz í viðtali við RÚV.

„Þegar ég byrjaði að hrópa mjög hátt á hann þá hrökk hann við. Ég man að ég spurði hann af hverju hann væri að þessu og hann svaraði að hann héldi að ég væri einhvers konar glæpamaður.“

„Maðurinn reyndi augljóslega að drepa okkur“

„Við komum heim og strákurinn fór að segja mömmu sinni hvað kom fyrir. Hann sagði að það hafi verið vondur maður sem skemmdi bílrúðuna í bílnum okkar og að pabbi hafi hrópað mjög hátt á hann. Þannig hann veit augljóslega hvað kom fyrir. Þetta er hans skilningur á atburðinum. Hann skilur ekki enn að maðurinn reyndi augljóslega að drepa okkur. Hvað er annað hægt að kalla þetta?“ bætti Mateusz við.

Mateusz segir að hann sé enn í miklu áfalli. „Mér myndi aldrei detta í hug að eitthvað slíkt gæti komið hérna upp. Ég er í miklu uppnámi. Guði sé lof að ég er á lífi. Sonur minn er á lífi og enginn annar hefur meiðst í þessum hræðilega atburði.“

Sjá má viðtalið í heild sinni á ruv.is

Facebook

Twitter

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.