Bandaríkjamennirnir Alexander Drueke og Andy Huynh eru í haldi Rússa en þeir börðust með Úkraínumönnum gegn Rússum í stríðinu í Úkraínu. Ekki er útilokað að þeir verði dæmdir til dauða fyrir þátttöku sína í stríðinu.

Þetta sagði Dmitrij Peskov, talsmaður Vladímír Pútíns forseta, í samtali við bandarísku NBC sjónvarpsstöðina í gærkvöldi. „Rússland getur ekki ábyrgst að bandarískir hermenn, teknir til fanga af Rússum í Úkraínu, sleppi við dauðarefsingu,“ sagði hann.

Þetta er í fyrsta sinn sem rússnesk yfirvöld tjá sig um mál Drueke og Huynh.

NBC segir að þeir hafi áður verið liðsmenn bandaríska hersins en hafi haldið til Úkraínu til að berjast með úkraínska hernum.

Þegar Peskov var spurður hvort Drueke og Huynh muni fá sama dóm og tveir Bretar og einn Marokkómaður, sem voru nýlega dæmdir til dauða í Donetsk, sagðist hann ekki geta sagt til um það. Niðurstaðan velti á rannsókn málsins.

Bretarnir og Marokkómaðurinn voru fundnir sekir um að vera málaliðar sem börðust gegn yfirvöldum í Donetsk sem hefur lýst yfir sjálfstæði frá Úkraínu.

Bandarísk stjórnvöld staðfestu á laugardaginn að þau hefuð séð ljósmyndir og upptökur af tveimur bandarískum ríkisborgurum sem „voru að sögn handteknir af rússneska hernum í Úkraínu“. Segjast stjórnvöld fylgjast vel með málinu.