Magnús Aron Magnússon, sem grunaður er um að hafa orðið nágranna sínum, Gylfa Bergmann Heimissyni, að bana í hrottalegri líkamsárás þann 4. júní síðastliðinn, hefur fengið dóm fyrir ofbeldi. Árið 2020 var hann sakfelldur fyrir ofbeldi og brot á barnaverndarlögum er hann veittist að ungum dreng.
Mbl.is greinir frá þessu.
Ofbeldið gegn barninu átti sér stað í október árið 2019 en þá var Magnús Aron tæplega 18 ára. Árásin er sögð hafa verið algjörlega tilefnislaus.
Nágrannar Magnúsar, sem DV hefur rætt við, hafa lýst honum sem tifandi tímasprengju, hafa talið að hann ætti fremur að búa í sérstöku úrræði en ekki almennu íbúahverfi. Skömmu fyrir voveiflegt lát Gylfa var lögregla tvisvar kölluð að húsinu í Barðavogi vegna meintrar ógnandi framkomu Magnúsar við aðra íbúa í húsinu.
Magnús hefur ratað í fréttir fyrir ofbeldi gegn hundum í Langholtshverfi og árið 2019 var hann handtekinn vegna ofbeldisfullrar hegðunar í garð mótmælenda á Austurvelli sem þá lýstu stuðningi við flóttamenn.
Í frétt Mbl.is kemur fram að líklegt er að Magnús sitji í gæsluvarðhaldi þar til málið gegn honum, vegna andláts Gylfa heitins, verður dómtekið. Rannsókn er sögð vera í fullum gangi og henni miði vel.
