Mikhail Khodorkovskij var ríkasti olígarki Rússlands en hann var eigandi og forstjóri olíufélagsins Yukos. Hann tengdist Vladímír Pútín, forseta, nánum böndum en allt tók þetta enda eftir að Khodorkovskij byrjaði að láta heyra í sér árið 2003 um spillinguna í Rússlandi og fór að gagnrýna ráðamenn.

Hann var handtekinn í kjölfarið og afplánaði tíu ára fangelsisdóm fyrir það sem mannréttindasamtök segja vera refsingu fyrir að gagnrýna rússneska ráðamenn.

Hann er nú í útlegð í Lundúnum og er einn þekktasti og mest áberandi landflótta andstæðingur Pútíns. Hann hefur margoft gagnrýnt innrásina í Úkraínu harkalega og í nýju viðtali við Financial Times varar hann Vesturlönd við næsta leik Pútíns.

Hann gagnrýnir Vesturlönd í viðtalinu og segir að þau átti sig ekki á hvað sé undir í stríðinu í Úkraínu og að það geti haft alvarlegar afleiðingar: „Ef við getum ekki sigrast á þessari pest í Úkraínu mun hún breiðast út til fleiri svæða. Ef Pútín sigrar í stríðinu í Úkraínu mun hann hefja stríð gegn NATÓ vegna vandræða heima fyrir.“

Hann sagðist ekki í neinum vafa um að stríð á milli Rússlands og NATÓ muni enda með algjörum ósigri Rússa. „Ef ekki væri fyrir öll fórnarlömbin þá myndi ég hafa sagt að ég væri mjög sáttur. Pútín hefur lagt upp í vegferð sem mun verða honum að bana. En sigurinn í Úkraínu veltur á Vesturlöndum,“ sagði hann einnig.