Vladímír Pútín, Rússlandsforseti, heimsótti í gær sýningu sem er helguð Pétri mikla til að minnast þess að 350 ár eru liðin frá fæðingu hans. Pútín lofsamaði Pétur mikla og líkti sjálfum sér við hann og sagði að þeir eigi það sameiginlegt að hafa tekið aftur land sem tilheyri Rússlandi.

„Pétur mikli háði stóra norðurstríðið í 21 ár. Það mætti halda að hann hafi verið í stríði við Svía, að hann hafi tekið eitthvað frá þeim. Hann tók ekkert frá þeim, hann tók það aftur sem Rússland átti,“ sagði hann að heimsókninni lokinni að sögn The Guardian.

Ummælum hans var sjónvarpað í gær og þar líkti hann hernaði Rússa í Úkraínu við baráttu Péturs mikla. „Svo virðist sem það falli í okkar hlut að taka það sem Rússland á og styrkja landið,“ sagði hann meðal annars.

Pútín hefur margoft reynt að réttlæta hernaðinn í Úkraínu, en hersveitir hans hafa drepið mörg þúsund manns, lagt borgir og bæi í eyði og hrakið milljónir manna á flótta, með því að halda fram þeirri söguskýringu sinni að Úkraína eigi sér enga sögu sjálfstæðis eða þjóðernisvitundar.