Barn datt af rafhlaupahjóli í Kópavogi síðdegis í gær. Fótbrotnaði barnið illa og var það flutt á bráðadeild. Í Hafnarfirði kom eldur upp í bifreið og leikur grunur á að kveikt hafi verið í henni.

Í Hlíðahverfi kom eldur upp í bifreið en þegar upp var staðið reyndist þetta vera lítils háttar eldur. Í Breiðholti var kveikt í ruslatunnu. Slökkvilið og lögreglan slökktu eldinn með góðri aðstoð tveggja ungra  stúlkna.

Í Árbæjarhverfi var tilkynnt um eld. Þar voru ungmenni í góðum gír að grilla á útigrilli að því er segir í dagbók lögreglunnar.

Fimm ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna.

Einn var kærður fyrir fjársvik eftir að hann neitaði að greiða reikninginn sinn á veitingahúsi í Miðborginni. Annar var kærður fyrir að neita að greiða fyrir akstur með leigubíl.

Í Hlíðahverfi datt maður af rafhlaupahjóli. Hann skarst á enni og reyndist vera ölvaður.

Í Kópavogi var brotist inn í fyrirtæki. Málið er í rannsókn.