Í dagbók lögreglunnar á höfuðborgarsvæðinu segir að „fjandinn“ hafi orðið laus í nótt en alls voru 100 mál skráð frá lögreglu á milli 17:00 og 05:00. Tíu manns gistu í fangaklefa eftir nóttina fyrir ýmis konar brot.
Þá var einnig nokkrum borgurum komið til aðstoðar en umræddir borgarar voru í „svo annarlegu ástandi að þeir voru ósjálfbjarga sökum ölvunar“. Níu ökumenn voru svo stöðvaðir fyrir akstur undir áhrifum áfengis og/eða fíkniefna.
Í miðbænum var karlmaður handtekinn og vistaður í fangaklefa vegna líkamsárásar en sá sem varð fyrir líkamsárásinni var fluttur á slysadeild til aðhlynningar.
Þá var annar karlmaður vistaður í fangaklefa eftir að hafa verið til vandræða í miðbænum. Maðurinn neitaði að gefa upp nafn sitt við lögreglu, sparkaði í lögreglumenn og hafði í hótunum.
Enn annar karlmaður var síðan vistaður í fangaklefa eftir að hann var að angra gesti í miðbænum. Lögreglan segir að hann hafi verið settur í fangaklefa þar sem hann „var ekki í ástandi til að vera úti á meðal fólks.
Í Hafnarfirðinum var karlmaður í annarlegu ástandi handtekinn fyrir utan skemmtistað. Hann var fluttur á lögreglustöð en þar var farið yfir málið með honum og í framhaldi af því var honum sleppt.
Lögreglan segir þá frá því að hún hafi þurft að hafa afskipti af fimm ungum krökkum sem voru að reykja kannabis. Málið var afgreitt með foreldrum barnanna og barnavernd.
Í Grafarvoginum var karlmaður handtekinn vegna líkamsárásar en hann réðst á nágranna sinn. Maðurinn var vistaður í fangaklefa.