Icelandair eykur umsvif sín og bætir við sig þremur nýjum sumaráfangastöðum. Þetta kemur fram í tilkynningu. Nýju staðirnir eru Róm, Nice og Raleigh–Durham í Norður-Karólínu.
Í tilkynningu segir að flugframboð Icelandair sé núna að aukast dag frá degi í tekt við sumaráætlun félagsins. Nú er flogið til 44 áfangastaða frá Keflavíkurflugvelli, 30 þeirra eru í Evropu og 14 eru í Norður-Ameríku.
„Langoftast er flogið til Kaupmannahafnar en þangað verður flogið allt að fimm sinnum á dag í sumar. Félagið flýgur þrisvar sinnum á dag til Boston, New York og Parísar og tvisvar á dag til London, Osló, Stokkhólms og Amsterdam. Þannig geta viðskiptavinir valið brottfarartíma innan dagsins sem hentar þeim best til og frá þessum áfangastöðum. Icelandair flýgur nú rúmlega 200 ferðir á viku til áfangastaða erlendis en tíðnin verður allt að 350 ferðir á viku þegar mest lætur. Þannig verður Icelandair með tæp 60% af heildarflugáætlun um Keflavíkurflugvöll og munu um 3.500 manns starfa hjá félaginu í sumar. Alls flýgur félagið 6.700 ferðir frá Keflavíkurflugvelli frá 1. maí til 1. október og heildarfjöldi flugsæta er um 2,5 milljónir.“
Félagið kynnir þrjá nýja „sólríka áfangastaði“ í sumar. Róm, Nice og Raleigh– Durham í Norður-Karólínu, en flug til Raleigh–Durham hófst þann 12. maí og styttist í að flogið verði beint til Rómar og Nice þann 6. júlí.
„Þá hefur félagið flug á nýjan leik til fjölda árstíðabundinna áfangastaða.
Heilsársáfangastaðir sem félagið býður flug til eru Kaupmannahöfn, Stokkhólmur, Osló, Helsinki, Amsterdam, París, Berlín, Frankfurt, Munchen, Zurich, London, Glasgow, Manchester, Dublin, Boston, New York, Seattle, Washington, Denver, Chicago, Toronto, Tenerife, Nuuk og Kulusuk.
Árstíðarbundnir áfangastaðir eru Róm, Nice, Montreal, Alicante, Raleigh–Durham, Bergen, Billund, Hamborg, Genf, Brussel, Minneapolis, Vancouver, Portland, Baltimore, Mílanó, Madrid, Salzburg, Orlando, Ilulissat og Narsarsuaq.“
Haft er eftir Boga Nils Bogasyni, forstjóra Icelandair, í tilkynningu:
„Við finnum fyrir miklum ferðaáhuga á öllum okkar mörkuðum og sumaráætlunin okkar er metnaðarfull og umfangsmikil í takt við það. Ísland er sem fyrr mjög vinsæll ferðamannastaður og má búast við að Icelandair flytji talsverðan fjölda ferðamanna til landsins í sumar sem munu skapa mikilvægar gjaldeyristekjur fyrir íslenskt hagkerfi. Einnig er ferðahugur í Íslendingum sem sækja sem fyrr mikið í sólina en auk þess höfum við fundið fyrir töluverðum áhuga á ferðum til að hvetja stelpurnar okkar á EM kvenna í knattspyrnu sem fram fer á Englandi í júlí.“
